9. maj 2002

UPA 2002/16

 

ALLANNGUUTISSATUT SIUNNERSUUT

uunga

 

Aalisarneq pillugu Inatsisartut inatsisaata allanngortinneqarneranik Inatsisartut inatsisissaattut siunnersuut.

 

Pingajussaaneerinninnermut Naalakkersuisunit saqqummiunneqartoq.

 

§ 1-imut

1. Nr. 4-mi § 22a imm. 2 aamma imm. 3-tut ilanngunneqassapput:
"Imm. 2. Imm. 1-mi aalajangersagaq namminersortut pisortalluunniit suliffeqarfiutaasa tunisassiorfinnik pioreersunik matuneqartunik tigusinissaannut akornusersuutitut atorneqaqqusaanngilaq. Tamanna aamma atuuppoq tigusinermut atatillugu tunisassiorneq allanngortinniarneqaraangat.
Imm. 3. Naalakkersuisut akuersissuteqarnerannut atatillugu susassaqartut tamarmik tusarniaavigineqartassapput."

Imm. 2 tamatuma kingorna imm. 4-nngorpoq.

2. Nr. 5-imi § 32 imm. 3 ima oqaasertaqassaaq aamma § 32 imm. 4-tut ilanngunneqassaaq:
"Imm. 3. Naalakkersuisut suliassani nalinginnaasuni §§ 5, 7, 9, 10, 11, 13, 18, 20, 22 aamma 23-mut tunngasuni Aalisarneq pillugu Siunnersuisoqatigiit tusarniaavigisassavaat.
Imm. 4. Apeqqutini imm. 3-mut ilaatinneqartuni kinguartinneqarsinnaanngitsuni Aalisarneq pillugu Siunnersuisoqatigiinni ilaasortanik tamanik allakkatigut Naalakkersuisut tusarniaatitsisinnaapput. Allakkatigut tusarniaaneq atorneqartassaaq siunnersuisoqatigiit isummerniarlutik ataatsimiissinnaanngikkaangata."

 

 

Aalisarneq pillugu Inatsisartut inatsisaata allanngortinneqarneranik Inatsisartut inatsisissaattut siunnersuummut allannguutissatut siunnersuummut nassuiaatit.

 

Nr. 1-imut

Siunnersuutip Inatsisartuni aappassaaneerneqarnerata kingorna imm. 2 imm. 4-nngortinneqarpoq, imm. 2-mik imm. 3-millu nutaanik ilanngussisoqarluni.

§ 22a imm. 2-mi aalajangersagaq Inatsisartut Aalisarnermut, Piniarnermut Nunalerinermullu Ataatsimiititaliaata 4. maj 2002 isumaliutissiissutaanit aallaaveqarpoq, ataatsimiititaliap kissaatai ilanngunneqarlutik.

Imm. 3-mi nalunaarneqarpoq susassaqartut tamarmik tusarniaavigineqartassasut. Tamatumani ilaatigut eqqarsaatigineqarput nunap immikkoortuani pineqartumi kommunit allat, sulisartut sulisitsisullu kattuffii susassaqartut kiisalu Unammilleqatigiinnermut Ataatsimiititaliaq.

Nr. 2-mut

Siunnersuutip Inatsisartuni aappassaaneerneqarnerata kingorna imm. 3 allanngortinneqarpoq, imm. 4-millu nutaamik ilanngussisoqarluni.

Naalakkersuisut suliassani nalinginnaasuni Aalisarneq pillugu Siunnersuisoqatigiinni ilaasortanik ataatsimut imaluunniit ataasiakkaarlugit tusarniaasarnissaannik § 32 imm. 3 aalajangersagaq allanngortinneqarpoq, oqaatsit " ilaasortaat ataatsimut imaluunniit ataasiakkaarlugit" peerneqarlutik. Inatsisartut Aalisarnermut, Piniarnermut Nunalerinermullu Ataatsimiititaliaata isumaliutissiissutaatigut Inatsisartunilu oqallinnermi erserpoq, aalajangersagaq suliassani tamani Aalisarneq pillugu Siunnersuisoqatigiinni ilaasortat tamarmik tusarniarneqartassanersut pillugu paatsungaanernik pilersitsisinnaasoq. Imm. 4-mik nutaamik ilanngussinikkut sukumiinerusumik erseqqissaasoqarpoq. Oqaatigineqassaaq oqaatsimi "ataatsimiissinnaanngikkaata" aamma oqarasuaatikkut ataatsimiissinnaanerit pineqarmata.

Pisortaqarfik maannamut Aalisarneq pillugu Siunnersuisoqatigiinnut ilaasortatut allattoqarfittullu atuussimavoq. Aalisarneq pillugu Siunnersuisoqatigiinni ilaasortat ataatsimeeqataasartullu tamarmik allakkatigut tusarniarneqartarnerat nalinginnaasumik suleriaasiunneqarsimavoq. Pisortaqarfik matuma kingorna Aalisarneq pillugu Siunnersuisoqatigiinnut allattoqarfiuginnassaaq, taamaattumillu tusarniaanerit, allakkatigut tusarniaanerit ingerlanneqartarnerat ilanngullugu, pisortaqarfiup suliassariuassallugit.

 

__________________________
UPA 2002/16
APNP J.nr. 64.00.01